Den harde kritikken mot Andersgaard kjem etter at direktør ved Kirurgisk klinikk, Trine Fleischer Eng, måtte gå frå stillinga si i sommar. Etter berre 6 månader i jobben.

Det har skapt stor uro og delvis raseri både ved Kirurgisk klinikk og andre avdelingar i sjukehuset.

Grunngjevinga frå administrerande direktør Alice Beate Andersgaard, var at Fleischer Eng ikkje hadde fått orden på økonomien.

Trine Fleischer Eng stadfestar det direktøren seier til NRK.
– Det var ikkje mitt ønskje å gå frå stillinga

Overlege ved Hamar sjukehus og tilsetterepresentant i styret i sjukehuset, Per Christensen, seier at Andersgaard bør gå av etter det som har skjedd.

– Andersgaard bør sjå seg sjølv i spegelen og tenkje på om ho er den rette personen til å føre arbeidet i sjukehuset vidare, seier Christensen

Fleischer Eng hadde nettopp starta på arbeidet med å snu økonomien ved Kirurgisk klinikk. Der har det vore overforbruk i mange år.

Men ho rakk altså å stå i jobben i berre seks månader før ho måtte gå av.
Ho var i gang med forbetringsarbeid og omorganiseringar, men fekk ikkje fullført arbeidet.

Christensen har i mange år vore tilsetterepresentant for legane i styret i helseføretaket.

På styremøtet i dag stilte han spørsmål ved kva Eng hadde gjort som ikkje var godt nok, og kvifor ho måtte gå,

Han framstilte det som om forbetringsarbeidet ved Kirurgisk klinikk har stoppa heilt opp etter at Eng måtte gå i sommar.

Han fekk støtte av Tone Kristine Amundgaard, også representant for dei tilsette.

Ho sa at oppseiinga har skapt stor uro i heile organisasjonen. Og at det var ein stor feil å tvinge henne til å gå av.

Kritikken har også komme til styreleiar Eli Giske før styremøtet i dag. Ho las opp eit brev underskrive fire leiarar ved Kirurgisk klinikk.

I brevet beklaga dei at Eng måtte gå og uttrykte bekymring for uroa som er skapt.
Dei skreiv også at forbetringsarbeidet ved klinikken er sett tilbake etter det som har hendt.

Alice Beate Andersgaard sjølv vil ikkje svare på spørsmålet om ho framleis har tillit.
Ho seier at ho har tru på at leiargruppa saman skal greie å drive sjukehuset vidare.

Men korkje styreleiaren eller andre styrerepresentantar uttrykte mistillit til Administrerande direktør Alice Beate Andersgaard.

–Eg har full tillit til administrerande direktør og det arbeidet ho gjer, seier Eli Giske til NRK.

Sjukehuset Innlandet har drive med overforbruk i mange år. I år har Helse Sør-Øst kravd eit overskot på 136 millionar.

Medan det ser ut til at dei også i år hamnar med eit underskot, rundt 70 millionar.

Heile sjukehuset står oppe i ei stor omorganisering og effektiviseringsarbeid. Der avdelingar blir slått saman og må samarbeide på tvers av geografi.

Det er for å få ned utgiftene og for å stå godt rusta når det nye spesialistsjukehuset i Moelv står klart i 2033.

Etter planen skal bygginga av det nye, store Mjøssjukehuset i Moelv starte i 2028. Men da krev Helse Sør-Øst orden på økonomien først.

Prosjektet er inne i årets statsbudsjett med ei låneramme på 18 milliardar og forprosjektet er i gang.

Byggestart er planlagt i 2028 og Mjøssjukehuset skal stå ferdig i 2033