Joan zen otsailean aurkeztu zen Gure Moneta, Euskal Herrirako sortu nahi den moneta berria. Printzipioz Gipuzkoan Oarsoaldean eta Nafarroan Baztanen egingo da hasierako zabalpena, eta ondoren Hego Euskal Herri guztira hedatu nahi da, baita Iparraldera ere, bertako Eusko monetarekin bat eginez.

Moneta berria urte amaierarako erabilgarri izaten hastea da eragile taldearen helburua eta otsailean egindako aurkezpenaren ondoren, bileteetan agertuko den irudia aukeratzeko epea ireki dute. www.guremoneta.eus/billeteak webgunearen bitartez zabaldu duten galdetegian proposamenak helarazteko aukera dago. Horrela, besteak beste, billeteetan agertzea nahi pertsonak edo pertsonaiak, animaliak, zuhaitzak edo landareak, lekuak edo paisaiak eta sinboloak idatzi behar dira, bakoitzean gutxienez bi eta bost proposamen jartzea gomendatzen dutelarik. Oraindik ez da erabaki monetaren izena baina euroaren balio bera izango du. Billeteak bat, bi, bost, hamar, hogei eta berrogehita hamarreko balioa edukiko dute.

Gure monetak duela hamairu urte Iparraldean jada martxan dagoen Eusko-ren bidea jarraitu nahi du. Helburua, «gure herrietako komunitateak bizigarriago egin, tokiko eragileen jarduera indartu eta jarduera ekonomikoa sustatzea» da adierazi dutenez. «Gure monetaren bidez erabilitako euro bakoitza Euskal Herrian bertan geratuko da eta, beraz, aberastasuna bertan birbanatuko da».

Hori bai, batzorde sustatzaileak azpimarratu du moneta guztiz legala dela eta tokiko moneta osagarri izaera edukiko duela; «Europar legediak jasotzen du oinarrizko araudia eta estatu bakoitzak garatzen du. Gure Monetaren kasuan, espainiar legedia beteko du eta Espainiako Bankua ere egitasmoaren jakitun da.