Саха сиригэр  биллэр судаарыстыбаннай уонна уопсастыбаннай диэйэтэл, айан таһаарааччы Анатолий Игнатьевич Чомчоевы чиэстээтилэр. Кинини үбүлүөйүнэн Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Анатолий Семёнов эҕэрдэлээтэ, өр сыллаах судаарыстыбаннай сулууспаҕа, нэһилиэнньэ куттала суох буолуутун хааччыйыыга уонна инженернэй өй-санаа сайдыытыгар киллэрбит кылаатын бэлиэтээтэ.

Анатолий Чомчоев олоҕун улахан аҥаара байыаннай сулууспаны кытта ситимнээх. Кини Сэбиэскэй Сойуус Сэбилэниилээх күүстэригэр хас да сыл сулууспалаабыта. Кини  Чернобыллааҕы АЭС саахалын содулун туоратыы кэмигэр «Укрытие» эбийиэгин тутууга суһал бөлөх ыстаабын салайбыта. Радиацияттан көмүскэнии исписэлииһин быһыытынан кини үрдүк радиационнай  кутталы намтатар сыаллаах быһаарыылары олоххо киллэрбитэ.

Байыаннай сулууспа кэнниттэн Анатолий Чомчoев судаарыстыбаннай былаас уорганнарыгар үлэтин салҕаабыта. Кини араас сылларга Үрдүкү Сэбиэккэ үлэлээбитэ уонна Үөһээ Бүлүү улууһун, Гражданскай оборуона уонна ыксаллаах быһыы-майгы дьыалаларыгар судаарыстыбаннай кэмитиэти салайбыта, Саха Өрөспүүбүлүкэтин Судаарыстыбаннай Мунньаҕар (Ил Түмэҥҥэ) норуот дьокутаатынан талыллыбыта.

«Кини  олоҕор бойобуой иэс, судаарыстыбаннай сулууспа уонна айар-тутар баҕа санаа силбэспит суола баар. Кини  олоҕун бүтүннүү төрөөбүт дойдутугар уонна дьонугар-сэргэтигэр сулууспалааһыҥҥа анаата», — диэн Анатолий Семёнов бэлиэтээтэ.

Анатолий Чомчоев үлэтигэр айааччы оруола ураты миэстэни ылар. Кэлиҥҥи сылларга кини альтернативнай эниэргийэ источниктарын сайыннарыыга болҕомтотун уурбута. Бу хайысха хоту дойдуга уонна Арктика сирдэригэр ураты суолталаах, манна энэргиэтикэ эйгэтигэр автономнай уонна эрэллээх быһаарыылар наадалар.

«Хоту уонна Арктика сирдэригэр бу хайысха стратегическай суолталаах. Анатолий Игнатьевич инникини толкуйдуур: тыйыс усулуобуйаҕа дьон олоҕун хайдах эрэллээх уонна табыгастаах оҥоруохха сөбүн, айылҕаны харыстааһын туһунан», — диэн бырабыыталыстыба бэрэссэдээтэлин солбуйааччы тоһоҕолоон бэлиэтээтэ.

Анатолий Чомчоев ону тэҥэ сырдатар үлэнэн дьарыктанар уонна мунньуммут билиитин-көрүүтүн, идэтин уопутун ыччакка тиэрдэр, наукаҕа, инженернэй дьыалаҕа уонна айар үлэҕэ интэриэһи сайыннарыыга болҕомтотун уурар.

Сиһилии: https://www.sakha.gov.ru/news/64136