Ungskáld standa fyrir ritlistakvöldi á Lyst í Lystigarðinum miðvikudagskvöldið 7. október nk. Kl. 20-22 og er það ætlað ungu fólki á aldrinum 16-25 ára sem hefur áhuga á skapandi skrifum. Þátttaka er ókeypis og veitingar verða í boði. En nauðsynlegt er að skrá sig á ritlistakvöldið – hér er hægt að skrá sig.

Á Lyst mætir Hildur Knútsdóttir rithöfundur sem hefur verið iðin við kolann að skrifa furðusögur og hrollvekjur og hefur einnig í samstarfi við Þórdísi Gísladóttur rithöfund skrifað vinsælar bækur um líf nútímaunglingsins á Íslandi.

Meðal bóka Hildar Knútsdóttur eru Vetrarfrí og Vetrarhörkur, Myrkrið milli stjarnanna, Hrím, Kasia og Magdalena, Gestir og þríleikurinn Ljónið, Nornin og Skógurinn. Verk Hildar hafa hlotið fjölmörg verðlaun og viðurkenningar, þeirra á meðal Íslensku bókmenntaverðlaunin, Barnabókaverðlaun Reykjavíkurborgar og Verðlaun bóksala.