Балаҕан ыйын 23 күнүттэн Арассыыйа икки эрэгийиэнигэр уматыгы атыылааһыҥҥа хааччахтары төннөрдүлэр.

Калуга уобалаһыгар уонна Забайкалье кыраайыгар уматыгы атыылааһыҥҥа хааччахтары төнүннэрдилэр.

Калуга уобалаһыгар «чёт-нечет» эрэсиим киирдэ — суоппардар массыыналарын нүөмэрин бастакы сыыппаратынан нэдиэлэ «четнай» уонна «четнайа суох» күннэригэр сөп түбэһиннэрэн, сапыраапкаланаллар. Бэнсиини кэниистирэҕэ буолбакка, массыына бааҕар эрэ куттар кыах бэриллэр.

Забайкалье кыраайыгар биир массыынаҕа АИ-92 уонна  АИ-95 бэнсиини 15 л эрэ куттары көҥүллээтилэр. Дизельнэй уматык лимиитэ суох атыыланар. Суһал ыстаап иһитиннэрбитинэн, ньиэп баазаларыгар уонна сапыраапкаларга 17 тыһ. туонна уматык баар — бу 20-чэ сууккаҕа тиийэр. Өссө 11,1 тыһ. туоннаны аҕалан иһэллэр.

Мантан сиэттэрэн, сапыраапкаларга уочараттар үөскүүллэр. Былаас бэрэстэбиитэллэрэ бу миэрэлэри дойду үрдүнэн уматык тиийбэтинэн быһаараллар. Эрэгийиэннэргэ кыһыны быһа туһаныллар уматык саппааһын оҥорорго бэлэмнэнэллэр.

Оттон Арассыыйа тутууга, олох-дьаһах хомунаалынай хаһаайыстыбатыгар миниистирэ Ирек Файзуллин бары эрэгийиэннэргэ бу кыстыкка  уматык саппааһа баар диэн этэн турар.